ကြားနေတစ်ယောက်ရဲ့ ထင်မြင်ယူဆချက်

ကြားနေတစ်ယောက်ရဲ့ ထင်မြင်ယူဆချက်

ရွေးကောက်ပွဲနီးလာတာနဲ့အမျှ တစ်ဘက်နဲ့တစ်ဘက်တိုက်ခိုက်ပြောဆိုမှုတွေ အရှိန်တက်လာတာကိုတွေ့နေရပါတယ်။ ဒီနေရာမှာ အနီလဲမဟုတ် အစိမ်းလဲမဟုတ်ဘဲ ကြားနေမယ်ဆိုတဲ့သူတွေအပေါ် တနည်းအားဖြင့် တတိယအင်အားစုတွေအပေါ်တိုက်ခိုက်မှုတွေဟာလည်း တဖြည်းဖြည်းများလာတာကိုတွေ့နေရပါတယ်။ ယင်းလူတွေဟာ “နိုင်ငံသားတစ်ယောက်ရဲ့ အခွင့်အရေးနှင့် တာဝန်ခံမှု (Right and Responsibility) ကိုနားမလည်သော ဦးနှောက်မရှိသော ငကြောင်များ” ပြင်းပြင်းထန်ထန် တိုက်ခိုက်ရေးသားတာကို တစ်ချို့ပိုစ့်တွေ့မှာတွေ့နေရပါတယ်။ တိုက်ခိုက်တယ်ဆိုတဲ့နေရာမှာလည်း အနီအုပ်စုတွေရဲ့ တိုက်ခိုက်မှုများသာ အများစုဖြစ်ပါတယ်..။

တကယ်တော့ ကြားနေမယ်ဆိုတာက အနီ (သို့) အစိမ်း ဘယ်ဘက်ကိုမှမပေးဘဲ အလယ်အလတ်ပါတီတွေကို ၀န်းရံပေးမယ်လို့ဆိုလိုချင်တာပါ။ မီဒီယာသမားတစ်ယောက်ကဆိုရင် ကျင့်ဝတ်ကိုဘေးချိတ်ပြီးတော့ “ကျွန်တော်တို့အနေနဲ့ NLD ပါတီကိုဝန်းရံပေးတယ်ဆိုတာ မတရားမှုကိုဆန့်ကျင်တဲ့နေရာမှာ ကြားနေလို့မရဘူးဆိုတဲ့ မူအနေနဲ့ ထောက်ခံပေးတာပါ” ဆိုပြီး ပြောဆိုခဲ့ဖူးတာတွေလဲရှိပါတယ်။ ( ဥပမာ- Eleven Media ဆိုရင် မီဒီယာဆိုတဲ့အသုံးအနှုန်းနဲ့တောင်မတန်ဘဲ တစ်ဘက်အုပ်စုကို ပေါ်ပေါ်ထင်ထင်ထောက်ခံပေးနေတာကို အားလုံးအသိဘဲဖြစ်ပါတယ်)

ဒီတော့ မြန်မာ့နိုင်ငံရေးမှာ မတရားမှုဆိုတာ ဘာကိုဆိုလိုပါသလဲ ? လက်ရှိ NLD သွားနေတဲ့လမ်းကြောင်းသာ အမှန်လို့ ယူဆပါသလား ? တခြားနိုင်ငံရေးပါတီတွေကရော ဒီမုိကရေစီစနစ်ကို သွားနေတာမဟုတ်ဘူးလား ?
NLD ဘက်ကကြည့်ရင် NLD မှန်သလို USDP ဘက်ကကြည့်ရင် USDP မှန်ပါတယ်။ တပ်မတော်ဘက်ကကြည့်ရင်လဲ တပ်မတော်မှန်ပါတယ်..။ ဒီတော့ ဘယ်ဟာကို အမှန်တရားလို့ယူဆမလဲ ?

ဒီမိုကရေစီပြုပြင်ပြောင်းလဲမှုမှာ အမေရိကန်ဒီမိုကရေစီလား အင်္ဂလန်ဒီမိုကရေစီလား..။ သူတို့ဒီမိုကရေစီနဲ့ ကွက်တိတူမှသာ ဒီမိုကရေစီလို့သတ်မှတ်မလား..။ ဒါဆိုရင်တော့ ခင်ဗျားတို့ ဆေးသောက်ချိန်တန်ပြီလို့ဘဲပြောပါရစေ..။

ကျွှန်တော်တို့နိုင်ငံဟာ အခုမှ ဒီမိုကရေစီပြုပြင်ပြောင်းလဲစနိုင်ငံပါ။ ဒီမိုကရေစီစနစ် ပီပီပြင်ပြင်မရှိသေးပါဘူး။ ဒါကိုလက်ခံပါတယ်..။ အနောက်နိုင်ငံတွေရဲ့ ဒီမိုကရေစီသက်တမ်းဟာ နှစ်ပေါင်းရာနဲ့ချီရှိနေပါပြီ။ သူတို့နိုင်ငံသားတွေရဲ့ တွေးခေါ်မြှော်မြင်နိုင်စွမ်းဟာလည်း ကျွန်တော်တို့နိုင်ငံသားတွေနဲ့ အများကြီးကွာသွားပါပြီ။ ကျွန်တော်တို့အနေနဲ့ ဒီမိုကရေစီစနစ်ကိုသွားတဲ့အခါမှာ ကိုယ့်နိုင်ငံရဲ့လက်ရှိပကတိအခြေအနေ၊ ကိုယ့်နိုင်ငံဖြစ်တည်လာတဲ့ နောက်ခံသမိုင်းကြောင်းကို ဘယ်လိုမှချန်လှစ်ထားလို့ မရနိုင်ပါဘူး။ အဲဒါတွေကို လျစ်လျုရှုပြီးဒီမိုကရေစီစနစ်ပီပြင်ဖို့ဆိုတဲ့ဟာတစ်ခုကိုသာ ဦးစားပေးပြီးဆောင်ရွက်မယ်ဆိုရင် ကောင်းကျိုးထက် ဆိုးကျိုးတွေကိုသာရင်ဆိုင်ရပါလိမ့်မယ်။

ကွယ်လွန်သူ ကုလသမဂ္ဂအတွင်းရေးမှုးချုပ်ဟောင်း ဦးသန့်ပြောခဲ့တဲ့ စကားတစ်ခွန်းကိုကိုးကားပါရစေ..။ “တိုင်းပြည်အုပ်ချုပ်ရေးစနစ်များအနက် ဒီမိုကရေစီစနစ်သည် အခက်ခဲဆုံးဖြစ်သည်။ ဒီမိုကရေစီစနစ်အောင်မြင်ရန် ပြည်သူပြည်သားတို့သည် အသိဥာဏ်ပညာနှင့် ဆင်ခြင်တုံတရား လုံလောက်အောင်ရှိကြရမည်။ အသိဥာဏ်နိမ့်ကင်းမဲ့သောနိုင်ငံတွင် ဒီမိုကရေစီစနစ်သည် ဗရုတ်သုခကိုသာဖြစ်စေလိမ့်မည်”..။ ကျွန်တော်တို့နိုင်ငံသားတွေက အသိဥာဏ်ကင်းမဲ့နေတာတော့ မဟုတ်ပါဘူး။ နိမ့်ကျနေသေးတာပါ။ ဒါကြောင့် ဒီမိုကရေစီစနစ်ကိုသွားတဲ့အခါမှ ညင်ညင်သာသာနဲ့ ပြောင်းလဲနိုင်ဖို့ကိုဘဲ လိုအပ်နေတာပါ။

ဒီတော့ ကျွန်တော်တို့အနေနဲ့ အနီ (သို့) အစိမ်းကို ပြတ်ပြတ်သားသား မရွေးချယ်ရုံနဲ့ ငကြောင်ဖြစ်သွားရောလား..။ ကျွန်တော်တို့အနေနဲ့ အကြမ်းဖက်မှုမှာ ကြားနေတာမဟုတ်ဘူး။ IS အဖွဲ့က လူသတ်မုဒိမ်းကျင့်နေရာမှာ ကြားနေတာမဟုတ်ဘူး..။ ကျွန်တော်တို့နိုင်ငံရဲ့ ဒီမိုကရေစီစနစ်အရ လွတ်လပ်စွာရွေးချယ်ပိုင်ခွင့်ဆိုတဲ့နေရာမှာ ကြားပါတီ (တနည်း) တတိယအင်အားစုကို ရွေးချယ်တာ..။ အနီ သို့မဟုတ် အစိမ်းကို မရွေးလို့သာ ငကြောင်ဖြစ်စတမ်းဆိုရင် တခြားနိုင်ငံရေးပါတီအားလုံးဟာလည်း ငကြောင်ဖြစ်သွားပါလိမ့်မယ်…။ ကျွန်တော်လဲ ငကြောင်ဖြစ်သွားပါလိမ့်မယ်…။

Credit: Kyi Win