ကချင်ပြည်နယ် ၊ မိုးကောင်းမြို့နယ်၊ ဆားမှော် ကျေးရွာအနီးဝန်းကျင်ရှိ ဒေသခံ တိုင်းလိုင် (ရှမ်းနီ) တိုင်းရင်းသားများမှ နယ်မြေခံအစိုးရတပ်အား ကချင်လွတ်လပ်ရေးတပ်မတော် (KIA) အဖွဲ့၏ လူသစ်စုဆောင်းခြင်းနှင့် လက်နက်ပြ အနိုင် ကျင့်ခြင်းတို့ကိုတားဆီး ဟန့်တားပေးရန် သြဂုတ် ၁၅ ရက်နေ့တွင် တိုင်းလိုင် (ရှမ်းနီ) ပါတီမှ တောင်းဆိုလိုက်ကြောင်း သတင်းရရှိသည်။
KIA အဖွဲ့မှ ဆားမှော်ကျေးရွာအနီးဝန်းကျင်ရှိ နင်ခရွတ်ကွင်း၊ အင်ခွတ်ကွင်းနှင့် ဘန်ဂျတ်ကွင်းတို့တွင် ဒေသခံပြည်သူများ အား နည်းမျိုးစုံဖြင့် အနိုင်ကျင့်နေမှုအပေါ် မခံမရပ်နိုင်ဖြစ်လာ၍ ယခုကဲ့သို့ လာရောက် တောင်းဆိုခြင်းဖြစ်ကြောင်း တိုင်းလိုင် (ရှမ်းနီ) ပါတီဝင် တစ်ဦးက ပြောသည်။
“ ကချင်စစ်သားတွေက ငါတို့ ရှမ်းနီတွေကို အနိုင်ကျင့်နေတာများပြီ၊ မခံမရပ်နိုင် ဖြစ်လွန်းတာကြောင့် ရှမ်းနီပါတီကို တိုင်ကြားစာပို့ထားတာပါ၊ အဲဒီလိုမှ မတိုင်ရင် သားကို KIA အဖွဲ့က လာခေါ်တော့မှာလေ ” ဟု နင်ခရွတ်ကွင်းတွင် လယ်ယာလုပ်ကိုင်သူ တစ်ဦးက ပြောသည်။
KIA အဖွဲ့အား ဆက်ကြေးငွေပေးရကြောင်း၊ အဓမ္မအလုပ် ခိုင်းစေမှုများလည်း ရှိကြောင်း၊ တာဝန်မကျေဟု အကြောင်း ပြကာ နင်ခရွတ်ကွင်းနေ တောင်သူတစ် ဦး၏ သားဖြစ်သူ မောင်ဆိုင်းအောင်အား KIA အဖွဲ့တွင် တာဝန်ထမ်းဆောင်ရန် မှင်နီဖြင့် စာရင်းမှတ်သွားကြောင်း၊ ကိုယ်တွေ့ကြုံသော ရွာသားတစ်ဦး ၏ ပြောကြားချက်အရ သိရသည်။
ဆားမှော်ကျေးရွာ တိုင်းလိုင် (ရှမ်းနီ)အမျိုးသားဖွံ့ဖြိုးတိုးတက်ရေးပါတီမှ ဥက္ကဋ္ဌ ဦးတင်ဝိုင်းက “ နင်ခရွတ်ကွင်းက တောင်သူ ဦးတင်ငွေရဲ့ တိုင်ကြားစာ ကျွန်တော်တို့ပါတီဆီ ရောက်နေပါပြီ၊ KIO၊ KIA အဖွဲ့ရဲ့ ဆက်ကြေးကောက်၊ အနိုင်ကျင့်ဆက်ဆံတာ၊ လူသစ်စုဆောင်းတာတွေကို တားဆီးဟန့်တားပေးဖို့ တိုင်ကြားတာပါ ” ဟု ပြောကြားသည်။
အဆိုပါ တိုင်ကြားစာနှင့်အတူ ဆားမှော်ကျေးရွာ တိုင်းလိုင် (ရှမ်းနီ) ပါတီမှ ဦးစီး၍ ဒေသခံ ပြည်သူ (၆၈) ယောက်တို့မှ နယ်မြေခံ အစိုးရတပ်သို့ KIO/KIA ၏ လက်နက်ပြ အနိုင်ကျင့်ခြင်း၊ လူ့အခွင့်အရေးချိုးဖောက်နေမှုများအတွက် တပ်မတော်မှ နယ်မြေစိုးမိုးရေး ဆောင်ရွက်ပေးနိုင်ရန်နှင့် ဆားမှော်အရှေ့ အင်ခွတ်ကွင်းတစ်ဝိုက်တွင် အမြဲတမ်း တပ်စခန်း တစ်ခုထိုင်၍ ပြည်သူ လူထုလုံခြုံရေးအား စောင့်ရှောက်ပေးရန် လက်မှတ်ရေးထိုး တောင်းဆို ထားသောစာများ ပေးအပ်ခဲ့ ကြောင်း တိုင်းလိုင် (ရှမ်းနီ) ပါတီ ဒုဥက္ကဋ္ဌ ဦးအောင်ဆန်းမှ ပြောကြားသွားသည်။
ဇော်လင်းသန့်
www.mohnyinnews.blogspot.com
No comments:
Post a Comment